institutus, quem velut tabernaculum suum consecravit Altissimus et in eo
sibi habitaculum preelegit, constituens ipsum populo suo ducem, viam salutis
et gratie fidelibus ostensurum. Hic est ordo absque qualibet dubitatione
fidelis, qui exemplo magistrorum magistros facit et instruit et sic nullos
apostatas a se mittit. Hic ordo sydereus in Ecclesie firmamento prerutilans,
quasi cipressus in altitudine se extollit, lumen prebens in tenebris et quietis
prestans umbraculum sub sarcina mundane miserie fatigatis. Hii sunt cultores
agri dominici argumentose probitatis industrii, a quibus semina conspersa
non pereunt et flores editi non arescunt. Hii sunt vinee Domini
Sabaoth sollertes agricole, qui vitiorum surculos a palmitibus prudenter
abscidunt, ipsos passillo fidei tenaci ligatura connectunt, ad virtutum exercitia
dirigunt et extendunt correctiones, extirpare fossorio plantaria maligna
nituntur et spiritualibus predicationis aquis ipsorum siccitates imbibunt.
Hii sunt athlete strenui lorica fidei loricati, quos adeo sacri pneumatis
ignis illuminat et ferventer accendit, ut se contra inimicos fidei ultroneis
opponentes affectibus dissolvi cupiant, ut triumphent. Nec est sub silentio
transeundum, quod fratrem Ioachim exponentem enigmata prophetiarum
dixisse legitur hunc ordinem, in columbe specie decoratum, antichristo tam
fideliter et viriliter obstaturum, cuius Ioachim libellus, licet sacro approbante
concilio sit dampnatus, hoc tamen circa dictum ipsius non legimus
improbatum. O beatum virum, cui talis erat nobilis successura posteritas,
que in galea fidei et lorica resistet intrepida cruente bestie vastature, ac in
eius fremitu tempestatis Enoc et Helyas, mittendi milites bellatores, ipsius
in decertando non respuent famulatum. Ut ergo devotis laudibus extollatur
in terris, quem honorari voluit Dominus et mandavit in celis, mandamus
quatenus festum confexoris huius die …, quem ad communem salutem
omnium civem celibem Christus Domino evocavit, cum debita reverentia
celebretis, a servili quolibet opere abstinentes, et faciatis sollempniter celebrari,
ut idem sedens ad dexteram summi Regis pro nobis et toto Christi
populo misericorditer intercedat, et ut ad reverentiam sancti huius vestra
universitas libentius invitetur, ipsius consideratione vos huberiori gratia
fecundantes XL dies de iniunctis vobis previis etc.
|
|