13

se reddiderunt. Similiter, castrum Sancti Cervasii et omnia castella de Valle Here Pisanis
se tradiderunt. Post hec, in festivitate Sancti Mathei, castrum de Pianusule pugnando fortiter
ceperunt et illud penitus usque ad fundamenta destruxerunt, et spolia illorum omnia
cum hominibus Pisis reduxerunt, et sic Lucenses magno dolore Lucam reversi sunt.
A.D. MCL. Octava Sancti Petri venerunt Lucenses obsidere castrum Vurnum cum
exercitu magno militum et peditum et sagittariorum, videlicet Florentinorum, Pistoriensium,
et cum tota Valle Debula, et edificaverunt ibi castella tria, scilicet Aspra de Porro et Saxo
Grumuli et Collemaioli, quod ante edificatum fuerat; et ibi steterunt per octo menses in
obsidione. Interea fecerunt Pisani exercitum magnum militum et peditum et sagittariorum,
cum comite Guidone, et magnam partem Lucensium devastaverunt. Interim cum maiori
parte exercitus ad castrum Sancte Marie de Monte venerunt et, pugnando fortiter, undique
burgos concremaverunt et totum in circuitu devastaverunt. Interea capitanei de Garfagnana
fecerunt et ordinaverunt consilium cum Lucensibus et cum nepotibus Soffredi ut venderent
castrum de Vurno; et ita fecerunt et vendiderunt quinque milia librarum Lucentium monete,
unde habuerunt in presenti libras MCC, et obsides XXVIII; et sic Lucenses castrum de Vurno
a nepotibus Soffredi habuerunt cum magnis securitatibus. Lucenses vero, pro magno dolore
et angustia et labore, et pro maximo danno de personis et pecunia, castrum de Vurno usque
ad fundamenta destruxerunt et non remansit lapidem supra lapidem.
A.D. MCLI. In mense Februarii dies VIII. Nos quidem senatores numero L gratia
Dei a domino Eugenio papa Pisano, totaque veneranda et apostolica curia, atque magnifico
et reverendo populo Romano, damus et firmamus pace perpetua cum populo Pisano, et omnes
ordines et supra posita ripa disponimus. Similiter populo Pisano damus pace perpetua a
populo Romano, et omnes ordines et supra posita ripe disponimus. Hoc factum ordinamentum
conpletum fuit sub legatione Bernardi Maragonis et Rainerii de Parlascio. Data
anno VII domini Eugeni papa III, indictione XIIII, mensis Martii dies XII, in Capitolio, in
consistorio novo palatii in renovationis vero seu restaurationis sacri senatus anno VII. Cum
Trasteberini fecimus pacem a termine in XX anni, eadem similiter.