quod nisi humeros haberetis suetos ad sarcinam, ad figurationem absentium
minus sufficiens redderetur. Nam si forsitan, ut verbis alludam, de tot
negotiis aliquid otii prudenter excerpitis, illud in re militari de cetero, que
parum habet commune cum litteris, vos expedit curiose consumere et de
armorum iudicio, cum Tyronis in vobis iam nomen effluxerit, non solum
verbo sed facto tractare. Confisus tamen, absens ego quantumlibet, dum
maxime de amicitie circumferentiis agitis, coram vobis semper ymaginarie
reddere me presentem, ad vos latorem presentium fiduciose transmitto, ut
quid mihi sit agendum in antea, sic, queso, consiliariter rescribatis.
Domino G. de Cusentia Nicolaus de Rocca.
Quod, post discessum vestrum, labore confractos, frigoris algore torpentes,
nivis gelide candore conspersos et ieiunii pressura famelicos sub
votiva tecta Venusii placidus vos hospes induxit et sufficienter, ut scribitis,
articulis singulis per opposita satisfecit, satis letanter id audio et residentis
moram propterea magis laudo. Sane si amici fuisset et socii consilio creditum,
|
|