didici sapientiam et non novi sanctorum scientiam. Loquitur de
acquisita, non de infusa. De qua ait ibi, Eccle. II: Sapientia quoque
perseveravit mecum. A Domino datur ista sapientia, quia,
sicut habetur Io. III: Non potest homo accipere quicquam, nisi
fuerit ei datum de celo, quia non est volentis neque currentis, sed
miserentis est Dei, Ro. IX. Ideo dicit Sapiens, Prover. II: Dominus
dat sapientiam, et ex ore eius prudentia et scientia. Item
Dan. II: Dat sapientiam sapientibus et scientiam intelligentibus
disciplinam. Item Ys. XXVIII: Quem docebit scientiam et quem
intelligere faciet auditum? Ablactatos a lacte, apulsos (vel avulsos)
ab uberibus. Ideo dicit Ecclesiasticus I: Fili, concupiscens sapientiam
conserva iustitiam, et Deus prebebit illam tibi. Sed non prebet
eam stultis. Ideo dicit Sapiens in Prover. XVII: Quid prodest
habere divitias stulto, cum sapientiam emere non possit? Item
Prover. XXIIII: Excelsa stulto sapientia, in porta non aperiet
os suum. Et nota quod Moyses habuit sapientiam acquisitam
et infusam. De prima habetur, Act. VII, quod eruditus erat omni
sapientia Egyptiorum et fuit potens in verbis et in operibus suis.
De secunda habetur, Eccli. IIII, quod sapientia filiis suis vitam
inspirat et suscipit exquirentes se et preibit in via iustitie. Item
Prover. IIII: Viam sapientie monstrabo tibi et ducam te per semitas
equitatis. Unde Dominus ait Moysi, Exo. XXV: Inspice et
fac secundum exemplar quod tibi in monte monstratum est.
Igitur magister Guillielmus Altisiodorensis habuit gratiam
disputandi, non autem populo predicandi. De primo dicit Gregorius:
«Nichil ad plenum scitur, nisi dente disputationis frangatur».
De secundo dicit Ecclesiasticus XVII: Nec enim omnia possunt
esse in hominibus.
Sequitur in Apostolo: Alteri fides in eodem Spiritu (supple:
«datur»). Hec data fuit Cornelio, qui per opera venit ad fidem,
Act. X. Hanc petiverunt apostoli a Domino dicentes, Luc. XVII:
Adauge nobis fidem. Hanc Dominus requirit ab eis, Luc. XVII:
Si habueritis fidem sicut granum sinapis et cet. Nota exemplum
illius sutoris sive cerdonis qui in terra Saracenorum transtulit
montem et Christianos liberavit. Require in illo sermone fratris
Luce: Salvatorem expectamus. Ideo dicit Iere. V: Domine, oculi
|
|