32. O quam perualde magno magi gaudio
uidentes stellam sunt gauisi. Protinus
intrantes domum inuenerunt puerum,
uirginis prolem.
33. Qui procedentes flexis eum genibus
adorauerunt, apertis de thesauris
aurum, thus, myrram obtulerunt domino,
regi deoque.
34. In somnis Perse ne redirent caelitus
sunt admoniti ad Herodem perfidum ammoniti.
Suam reuersi sunt uiam per aliam
in regionem.
35. Illusum demens se uidens rex impius
a magis, Bethleem misit, cunctos pueros
mox a bimatu et infra per gladium
mandat extingui.
36. O quam crudelis seuaque sententia.
Mactare iubes teneram infantiam,
insciam mali. Cur non parcis, impie,
lacteae proli?
37. Vox in excelsis, heu, quam tristis resonat,
ploratus multus, ululatus maximus.
Maternus luctus frustra premit ubera
nullo sugente.
38. Saluete flores martyrum candiduli,
respersi tamen rore sed purpureo,
felices nati hac in luce rosuli,
pulcri, tenelli.
|
|