illi viri spirituales, qui zelum pro dei nomine assumunt, qui cum magna mentis
indignatione populi increpant delicta et quasi ignem zeli super plebem peccatricem
effundunt iuxta illud, quod Ysaie dicitur: Obceca cor populi huius etc.
Quinta itaque libri parte ira dei consummata designatur in populo, quia scriptum
est: Per tres annos veni querens fructum in arbore hac, et non invenio. Succide
ergo illam. Rogat colonus, et datur ei de indulgentia annus quartus. In quinto
vero absque retractatione succiditur. Quantum ergo ad deum, tunc succiditur
genus humanum, cum propter precedentia delicta et impenitens cor dimittit eos
dominus in adinventionibus suis.
Quatuor sunt Christi opera: nativitas, passio, resurrectio, ascensio. Dignitate
vero prescribitur resurrectio. Resurrectio pertinet ad apostolicam fidem,
passio ad martyrum patientiam, nativitas ad doctorum humilitatem, ascensio ad
contemplantium spem. Quinto loco advenit ignis divinus super congregatos in
unum et docuit eos omnem equitatem. Caritas enim plenitudo est mandatorum.
Quinto ergo loco consummatur perfectio bonorum in igne caritatis dei,
quinto loco consummatur ignis ire super malitia peccatorum. Accidit autem hoc
iudicium per singula tempora, quia habet unumquodque tempus proportiones
suas, sed precipue in hoc quinto tempore, in quo rei huius proprietas est.
[5.] Sexta pars in messione deputata est seculi, et succisum in quinta parte
nemus combustioni tunc traditur. Ostenditur enim in ea iudicium bestie,
principaliter illorum hominum, qui principaliter persequuntur ecclesiam, generaliter
vero ubicumque sunt propagata Babilonis genimina. Quis faciet istud?
Bestia cum cornibus suis. Babilon est populus, qui dicitur christianus, sed non
est, qui contaminat terram domini et polluit sancta. Suscitabit ergo dominus
contra immunditiam populi gentem terribilem, que designatur in bestia, et veluti
quidam operarii succident nemora multa ad facienda novalia, et purgabitur sentibus
ager mundi. Incipient autem electi confortari in domino, sed bestia pugnabit
adversus illos et cum illa pseudoprophete. Exurget autem dominus in iudicium
et triumphabit de gentibus illis et erit pax. Edificabitur enim Ierusalem
nova in angustia temporum. In novissimis autem diebus absolvetur diabolus,
qui iamdudum alligatus est, et seducet gentes que sunt super quatuor
|
|