Pag 307

et diuiciis affluebant. Homines uero illius terre benigne recipientes
Alexandrum, multa sibi et exercitui suo commoda contulerunt;
et stetit ibi Alexander diebus triginta. Erantque ibi gentes,
que nominabantur Seres, et erant ibi in eadem terra arbores
folia ut lana habentes. Que gens ipsam colligebat lanam et
uestimenta inde faciebat. Milites uero Alexandri in duplo erant
animosiores ex uictoriis, quas erant ex bestiis consecuti etc.
Quomodo Alexander interfecit Porum, regem Indorum etc.
89. Deinde amoto exercitu Alexander uenit ad locum, ubi
Porus, rex Indorum, cum exercitu residebat. Alexander ordinatis
cateruis ascendit equum suum Butifalem et facto impetu ante
omnes et pulsatis tubis bellicis ceperunt uiriliter preliari. Indi
uero cadebant in prelio. Cum autem Porus suos udisset in prelio
deficere, stetit ante omnes, altaque uoce dicebat Alexandro:
"Non decet imperatorem sic in uacuum suum impendere populum,
sed per semetipsum pugnat. Stet igitur populus tuus ex una
parte et meus ex altera parte et soli ambo uidentibus omnibus
preliemur. Qud si me uiceris, populus meus subiciatur tibi.
Si uero tu in manibus meis defeceris, populus tuus meo imperio
subiugetur." Hoc ideo dicebat Porus despiciens Alexandrum
propter corporis sui paruitatem. Statura enim Alexandri tribus
cubitis longa erat. Considerabatque Porus magnitudinem sui
corporis, qui quinque cubitorum altitudine uidebatur. Sed ignorabat
audaciam et uirtutem, que in corpusculo Alexandri
latebat. Et statim quiescentibus aciebus ipsorum utrique reges
inter se solito more pugnare ceperunt. Porus uero impetum
faciens in Alexandrum eum taliter percussit, ut eum semiuiuum
relinqueret. Hanc uero percussionem milites intuentes, omnes
una uoce clamare ceperunt. Porus uero audiens clamorem illorum,
uertens se contra suos eos redarguere cepit. Alexander
autem tamquam uir fortis et audax confidens in suorum uirium
fortitudine faciens impetum in Porum complicatis bracchiis percussit
ita fortiter caput eius gladio, quod ipsum continuo interfecit.
Videntes hoc Indi Porum regem ipsorum deficere in bello, ceperunt
statim cum Macedonibus preliari acriter. Quibus Alexander
dixit: "O miseri, quid post mortem regis pugnare conamini?
An nescitis, quod ubi non est gubernator, populus dissipatur?"
Responderunt Indi dicentes: "Melius est nobis pugnare uiriliter
et in campo deficere, quam uidere desolacionem gentis nostre
et ut bonis propriis spoliemur." Quibus Alexander dixit: "Cesset
indignacio uestra et cum libertate hylares ad patriam redeatis!
Nullam siquidem a nobis iniuriam paciemini, eo quod uiriliter
pugnastis." Indi statim eiectis armis ceperunt Alexandrum quasi
deum glorificare. Alexander uero castrametatus est ibi et diis
suis uictimas immolauit et precepit, ut corpora mortuorum
sepulcris conderentur. Et Porum regem honorifice sepeliuit etc.