Hismahel quidem effecti insecuntur puerum,
Ut pilosi se vicissim clamant alter alterum,
Faciunt opus servile, omne genus laterum.
Ab his sumpsit monachellus publicam audaciam
In constituendis vappis per nummi fallaciam
Cum pecudibus Romanis tenens Neomaciam.
Qualemcumque depascebat in stabulo asinum,
Per quem posset precantare stolidorum fascinum;
Illi cruscas, sibi dabat panem similaginum.
Sed Prandelli Asinander, asinus hereticus,
Congregavit Patarinos ex viis et sepibus
Et replevit totam terram urticis et vepribus.
Qui dicebant: Non est templum, non est sacerdotium,
Nuptiarum improbabant stabile negotium;
Sacrifitium ridebant sedentes in ocium.
Non est deus asserentes - quid apostatacius? -
Facti sunt ut Symon magus, ut mendax Acacius,
Non refugiunt ad petram sicut herinacius.
|
|