Altera autem die dux Uenetie cum magna nauium et populi multitudine, et patriarcha Uenetie
simul cum patriarcha Aquileie et omnibus suis suffraganeis ad pedes Alexandri pape
humiliter accedentes, ipsum processionaliter cum summo honore et gloria usque ad sancti
Marci ecclesiam deduxerunt, in qua facta oratione populum benedixit. Dehinc nauem ducis
cum ipso simul ingressus, usque ad palatium patriarche ueniens, in ipso hospitio se recepit.
Episcopi autem et abbates uicinarum partium, aduentu pape cognito, omnes cum suis clericis
ad eius uestigia deuote [et] humiliter accesserunt. In festo autem annuntiationis Uirginis
papa a duce Uenetie et magnatibus eius affectuose rogatus ad ecclesiam sancti Marci cum
cardinalibus suis accessit, et in ea missam publice decantauit.
Fridericus autem imperator, qui apud Cesenas morabatur, cum aduentum pape in Uenetiis
cognouisset, Madeburgensem archiepiscopum et electum Guarmaciensem et protonotarium
suum ad eum transmisit, affectuose postulans, ut, si ei placeret, locum futuri colloquii a
Bononia transmutaret; non enim sibi tutum fore arbitrabatur, Christianum cancellarium suum
cum aliis nuntiis illuc dirigere, eo quod eiusdem loci ciuibus odiosus esset pariter et offensus,
quia eos in bello deuicerat et iniurias plurimas et dampna intulerat. Quibus papa respondit:
Imperator legatorum nostrorum et Lombardorum consilio, communi pariter et assensu, tractatum
pacis apud Bononiam habere disposuit, quod ergo de eorum communi uoluntate est
dispositum, non debet sine communi consilio immutari. Qua de causa Alexander papa
cardinalibus, qui erant Rauenne, archiepiscopis, episcopis et abbatibus, potestatibus, consulibus
et rectoribus Lombardie mandauit, ut ei Ferrariam occurrerent, quatinus, communicato
eorum consilio, imperatori de loco, in quo habendum esset pacis colloquium, et de alii suis
petitionibus responderet. Ipse uero cum Uenetiis diebus esset quindecim demoratus, per
mare Lauretum uenit, dehinc per Padum Ferrariam cum galeis undecim in dominica passionis
ascendit. Ubi ab episcopis multis et eiusdem urbis ciuibus et magna populi multitudine,
que illuc propter feriam, que illuc celebrabatur, conuenerat, satis est magnifice et honeste
susceptus. Proxima uero septimana Rauennas archiepiscopus cum suis suffraganeis,
|
|