Liber.
O quam terribilis et abhominabilis est huius bestie
aspectus. unde miror, quod in serie visionis tam terribilem
effigiem potuit anima tolerare. verum tamen certificari
peropto, unde contraxerit originem, quo nomine vocetur, ubi
habitet, et quibus hactenus intulerit lesionem,
Auctor.
Mater autem huius bestie fuit nature celestis. que
superbia nuncupatur. et ista vocatur invidia, que in se
continet omnia contagia viciorum.
Quot enim et quantos non dico ledat et leserit, set
vituperabili morte affecerit, et afflixerit diversis generibus
tormentorum, ita munerare valerem sicut arenas litorum
et stellas fixas in ambitu firmamenti.
Verum tamen ad instructionem tuam de infinitorum agminibus
aliquos nominabo. hec siquidem primitivum sanguinem
Habel effudit. Joseph vendidit Ysmahelitis. Conbussit
Babilonie satrapas in camino. porrexit Damasceno
venenum. item palatum Homeri ferreo clavo transfixit.
toxicavit Socratem cum suco cicute. a bimatu
et infra in Betehlem pueros iugulavit. mittere in
Christum dominum manum presumpsit. multos prophetas
apostolos et imitatores dei usque ad mortem variis penis
afflixit. hec etiam Cesarem in capitolio viginti quinque
vulneribus interfecit. Tullium Ciceronem mutilatum lingua
peremit. Boetium carceravit. exilio proscripsit Nasonem.
reiecit Virgilium a laribus mantuanis. Senecam in balneo
mori coegit. occidit Lucanum. Juvenalem in Egyptum ad
moriendum transmisit. infamavit de heresi Priscianum.
mearum salutacionum tabulas fumigavit, ut illas indueret
sophisticam vetustatem. quid plura? tot persecuta est et
persequi non desistit, quot felicitatem aliquam habuerunt
|
|