exemplum, ab utraque parte fluminis
Padi mandavimus suspendendos. Ad
eundem filium nostrum iterato Majestatis nostrae
directo mandato: ut cum Ferrariensibus
fidelibus antedictis Cumanis et Sacoiensibus
quos pro eodem negotio provisio nostra
fecerat convenire, ac Cremonensibus etiam
expertis fidelibus nostris, qui verecundum extimant
si se cunctis nostris servitiis non immiscent,
ad construendum et optime muniendum
pontem eundem, cum strenuitate procedat,
omni sublato dubitationis obstaculo, et
plene paratis singulis ad id facientibus
opportunis. Post emissum vero nostrae Majestatis
edictum de praemissis vobis ad gaudium
describendis, literas Friderici comitis Albae
dilecti filii nostri recepimus, continentes
qualiter in virtute Dei et nostrae felicitate fortunae,
partem Guelphorum Florentiae,
cui dudum nostra Majestas pepercerat, cum
juste ad ipsius exterminium procedere potuisset,
quae velut familiaris et pestilens Cardinalis
Octavianensis tractatibus exposita Bononiensibus
nostris proditoribus advocatis,
civitatem Florentiae per intestinum bellum nobis
subtrahere intendebat, fidelium nostrorum
assistentibus sibi suffragiis debellavit: et
nonnullis captis, quosdam de civitate ipsa violenter
ejecit. Ex quo totius provinciae status
in melius sine dubitatione dirigitur, et fidelium