Arce piis meritis varias a corde figuras;
Desidiam et somnos arce piis meritis.
Currere cede viam tua per vestigia sursum;
Nil remorante fide currere cede viam.
Guttura claude lupi semper lacerare parati;
Ne male me rapiat, guttura claude lupi.
Cor labiumque meum fac laudent cuncta creantem;
Christum habeant semper cor labiumque meum.
Pestifer ille draco mea ne procul intima turbet,
Nonque michi occurrat pestifer ille draco.
Me tua sancta phalanx habeat post funera carnis;
Oro, ne excludat me tua sancta phalanx.
Omnia nempe potes meriti pro lampade summi;
Magnus amice dei, omnia nempe potes.
Perfice cuncta, precor, per eum quem semper amasti;
Dulcis amande pater, perfice cuncta precor.
Sit tibi laus et honor, pietas immensa, per aevum,
Qui tam mira facis, sit tibi laus et honor.
-------------------------------------------------------
Ymnum quoque singula eiusdem patris miracula continentem metro iambico
archiloico ita texuimus:
1. Fratres alacri pectore
Venite concentu pari,
Fruamur huius inclitae
Festivitatis gaudiis.
2. Hac Benedictus aurea.
Ostensor arti tramitis,
Ad regna conscendit pater,
Captans laborum praemia.
3. Effulsit ut sidus novum,
Mundana pellens nubila.
Aetatis ipso limine
Despexit aevi florida.
4. Miraculorum praepotens,
Afflatus alti flamine,
Resplenduit prodigiis
Ventura seclo praecinens.
5. Laturus esum pluribus,
Panis reformat vasculum;
Artum petens ergastulum,
Extinxit ignes ignibus.
6. Fregit veneni baiulam
Crucis per arma cymbiam.
Coercuit mentem vagam
Leni flagello corporis.
|
|