Item. in predicta ecclesia. in medio chori ecclesie Golgatane est in
pavimento unus lapis rotundus. qui est perforatus et dicitur. quod
est in medio mundi comiter. sed quidam dicunt. quod est mons Calvarie.
videlicet illud foramen. ubi posita fuit crux. quidam autem dicunt. quod
est sepulcrum Domini in medio mundi. ubi Cristus jacuit mortuus. sed
certum est. quod Jherusalem est in medio mundi et ecclesia sepulchri, in
qua est mons Calvarie et sepulchrum. ubi jacuit. et lapis. qui dicitur
medium mundi et omnia ista sunt vilde propinqua.
Ecclesia sepulcri Domini non habet portas ante faciem ecclesie. quia ab uno
capite est volta ad modus unius capelle altaris majoris. sed porte sepulchri
sunt a latere versus plateam sepulchri et sunt valde bene formate. et per illas est
introitus ad ecclesiam sepulchri. Ab alio latere sepulchri Domini sive ecclesie.
sunt alie due porte parve. et per illas possumus similiter exire de ecclesia.
et ibi extra sunt domus projecte. que quidem prelatorum fuerunt
serviencium sepulchro et nunc non habitantur. Sed peregrini. qui clauduntur
in sepulchro. possunt ibi exire causa alicujus recreationis. non tamen possunt recedere. cum sint ibi muri altissimi et nullus sit aditus egrediendi.
Extra ecclesiam sepulchri a latere sinistro intrando ecclesiam. est unum
pulchrum campanile, ymmo pulcherrimum. quod fuit edificatum per
sanctam Helenam: a summo usque deorsum est de vivis lapidibus sculptis
laboratum.
Juxta campanile a latere sinistro platee sepulchri. est una capella
Grecorum. et est pulchra et magna. et ibi faciunt officium Greci
modo greco. et est ibi unus patriarcha Grecorum et multi calogeri. id est
fratres greci. et multe mulieres grece. valde devote.
Prope portas sepulchri a latere dextro juxta plateam contiguam cum
muro ecclesie sepulchri. est una scala lapidea XVj graduum cum hiis.
que sunt super hostium muratum. et ista scala ascendit ad montem
Calvarie de foris ab ecclesia ista. quod est ibi ad modum unius pinaculi
templi extra ecclesiam: sed nullus potest modo ascendere. quod hostium
est muratum: est enim locus magne devocionis.