purgationem peccatorum faciens, sedet ad dexteram maiestatis in
excelsis, tanto melior angelis effectus, quanto prae illis differentius
nomen hereditauit.
I 32 (I 32 + 51) Intueri igitur in his apostolicis uerbis suptiliter
libet, quomodo doctor mirabilis et utrarumque inlustrius naturarum
proprietatem discreuerit, et personam unigeniti deique ueri
excellentius intuens, in utraque natura indifferenter ponens, nec per
adoptionis ingeminat praerogatiua nec inmutat per nuncupationis
dedecore, sed unum eundemque dominum Iesum Christum uerum
dei filium uerumque praedicat deum et ante saecula sine initio
ex patre et in fine saeculorum temporaliter genitum ex uirgine
matre. Porro cum multis modis olim asserat deum locutum fuisse
patribus in prophetis et nouissime in filio, euidentius utrumque
significat: et uerbi coaeterni patris sempiternae diuinitatis gloriam
praedicat et adsumptae carnis ineffabilis mysterii praemonet sacramentum.
Nam et patribus olim per prophetas in uerbo suo, hoc
est in unigenito, locutus est, et nobis nouissimis diebus in eodem
filio, hoc est per incarnatam dei sapientiam, sicuti isdem filius et
ex eo quod multis modis olim et per id quod in nouissimis diebus
in semetipso locutus est, per Esaiam testatur dicens: Ecce ego ipse
qui loquebar adsum . Et per eundem rursus prophetam spiritus
sanctus de eo non siluit: Oculo ait ad oculum uidebunt, cum conuerterit
dominus Sion. Ipsa namque incarnata ueritas aliena ab omni
fallaciae neuo, quae mentiri nullomodo potest, ueritatis de se
testimonium perhibet dicens: Ecce ego qui loquebar adsum. Et: Ego
dominus et non mutor. Mendax autem per hereticorum ora spiritus
conatur adstruere, quia per incarnationis dispensationem et unigeniti
proprietas in dualitate nominis sit geminata, in proprii scilicet
et adoptatiui, et unio indiuiduae deitatis in plurali sit numero
perfida calculatione diuisa, hoc est in ueri ac nuncupatiui dei. Cui
nimirum tam impiae adsertionis auditui catholica fides nulla umquam
ratione patentium aurium praebere patitur rimas. Nam et
ante incarnationis mysterium et post adsumptionis sacramentum
|
|