in locis ignotis et peregrinis affligi, et
fortasse dubitantes de reditu, dum timorem
eis incutit, quae potuit oriri suspicio
de recessu; nos pietate solita eorum in hac parte
formidinem submoventes, omnibus praedictis
redeundi ad propria licentiam indulgemus.
Illis tamen praesentis indulgentiae nostrae
gratia carituris, quos vel participatio
nuper in personam nostram concepti sceleris,
vel alias in Majestatem nostram commissa
vel tractata proditio, cum istis, nedum
patria, sed cunctus terrarum etiam claudendus
sit orbis, irremediabiliter de patria profugavit.
Illis etiam veniae praesentis beneficium denegamus,
quos propter praeteritam vel praesentem
inter nos et Papam discordiam, perversorum
operum nobis judicia manifesta notavere
perfidia; vel nostrae Celsitudini fecere suspectos;
vel post nimis obduratam ipsorum
contumaciam, ex maleficiis aliis forbannitionis
sententiam incurrerunt. Quapropter villicationi
tuae mandamus, quatenus omnibus
de regno, quos in quibuslibet iurisdictionis
tuae partibus inveneris receptatos, praesentis
indulgentiae nostrae seriem facias
publicare.