Bichilinus de Spelo: Pomerium rethorice

Pag 20


Capitulum III
 
DE SALUTACIONIBUS AD RELIGIOSOS
 
1. Qualiter scribitur prelatis ordinum
 
Venerabili viro sacre theologie diademate presignito, vel reverendo
viro cui multiplicium scienciarum apex venerabile dedit nomen,
vel philosophico viro multiplicis sciencie et sapiencie radiis illustrato
domino fratri .F. tocius ordinis Minorum generali ministro, vel predicatori
generali magistro, vel Heremitarum generali priori, vel sic:
Fratri .P. ministro fratrum Minorum in provincia Lombardie, vel
priori fratrum Predicatorum, vel Heremitarum in provincia superioris
Alamannie; vel sic: fratri tali inquisitori heretice pravitatis in provincia
Marchie Tarvisine talis etc. salutem et divinam graciam in presenti
et gloriam in futuro, vel salutem et ad dignitatis gradum ascendere
alciorem, vel salutem et dignis meritis ad cardinalatum pervenire, vel
salutem et provehi dignissime ad Beati Petri cathedram pastoralem.
 
2. Qualiter scribitur minoribus clericis
 
Minoribus clericis poterit sic scribi: Titulis adornato virtutum
domino .I. priori talis loci, vel discrete magne nobilitatis et sapiencie
viro domino bisanti, vel archidiacono, vel diacono, vel providis et
discretis viris talibus canonicis Tarvisinis; vel sic: discreto eximia
probitate circumdato domino .F. clerico, vel capellano talis ecclesie
.P. cum humili recommendacione se totum, vel debitam reverenciam
et honorem, vel salus cum obtentu felicium; vel sic: discreto et honesto
viro tali presbytero talis ecclesie salutem et reverenciam debitam; vel
sic: dilecto sibi presbytero .M. de Sancto .P. salutem et prosperitatem
eventuum; vel sic: provido viro tenere predilecto domino .M. de
Taranto clerico Sancti Petri ac generali gerulo et factori episcopi Tarantini
salutem et antiquam amiciciam semper sub prosperitatibus
renovari.
 
3. Qualiter scribitur lectoribus ordinum
 
Honoratissimo viro fratri .B. de Vincentia ordinis Predicatorum,
vel Minorum in conventu Veneto sacre theologie doctori; vel sic: sapientissimo
viro tam divinis quam humanis predotato scienciis fratri
.P. talis ordinis principali magistro, vel secundario lectori in conventu
Paduano talis salutem, ad magna pervenire culmina dignitatis.

Torna all'inizio