Salimbene de Adam: Cronica

Pag 704


Quod videntes Saraceni, timore compulsi, pacta cum Christianis
inierunt. Inter que dicuntur fuisse precipua ut omnes Christiani
captivi in illo regno liberi dimitterentur, et quod in monasteriis,
ad honorem Christi nominis in omnibus civitatibus regni illius
constructis, fides Christi per fratres Minores et Predicatores
et per alios quoscumque libere predicetur, et volentes baptiçari
libere baptiçentur; et solutis expensis regibus, quas ibi fecerant,
rex Tunicii regis Sicilie tributarius est effectus. Plura alia pacta
fuerunt, que hic longum fuisset ponere. Et cum ex adventu
domini Oduardi regis Anglie et multitudine Frixonum et aliorum
peregrinorum in tantum creverat exercitus Christianorum, quod
circa ducenta milia pugnatorum crederentur, et sperarent quod
non solum Terram Sanctam, sed etiam totum Saracenismum subiugare
debuissent, peccatis exigentibus absque ulteriori utilitate
est dispersus. Nam legatus, qui ipsos dirigere debuerat, per mortem
subtractus erat. Terra etiam Sancta, ad quam ire debuerant, gubernatore
peregrinorum carebat. Patriarcha, qui legatus in Terra
Sancta fuit, defunctus erat. Sedes etiam apostolica, que utrobique
providere debebat, tunc vacabat. Rex etiam Navarre, qui
infirmus de Affrica processerat, in Siciliam veniens est defunctus.
De translatione corporis sancti Lodoyci, quam faciebat Philippus rex Francie,
filius suus, cum exercitu suo.

Anno Domini MCCLXXI, indictione XIIII, die ultimo mensis
Marcii transivit et venit Phylippus rex Francie cum fratre suo
et cum exercitu suo et hospitatus fuit in palatio domini episcopi
Regini Guilielmi de Foliano, qui tunc temporis erat. Qui rex ibat
in Franciam cum corpore patris sui condam domini Lodoyci regis
Francie, quod deportaverat de Affrica; qui rex obierat in terra
Carthaginis prope civitatem Tunicii. Et deportabat eum in una
capsa conditum cum aromatibus, et in una alia capsa portabat
Tristan fratrem suum et filium condam predicti regis, qui ibidem
in dicta terra Cartaginis obierat cum multis aliis baronibus qui
ibant ad recuperandam Terram Sanctam de ultramare.

Torna all'inizio