Munera magna vehis divinis dives asylis,
Regificis mensis munera magna vehis.
Ver tibi semper inest, viridi dum cespite polles;
Frigora dum superas, ver tibi semper inest.
Cinctus oliviferis utroque es margine silvis;
Numquam fronde cares cinctus oliviferis.
Punica mala rubent laetos hinc inde per hortos;
Mixta simul lauris Punica mala rubent.
Myrtea virga suis redolet de more corimbis,
Apta est et foliis myrtea virga suis.
Vincit odore suo delatum Perside malum,
Citreon has omnes vincit odore suo.
Cedat et ipse tibi me iudice furvus Avernus,
Epyrique lacus cedat et ipse tibi.
Cedat et ipse tibi vitrea qui Fucinus unda est,
Lucrinusque potens cedat et ipse tibi.
Vinceres omne fretum, si te calcasset Iesus,
Si Galilaeus eras, vinceres omne fretum.
Fluctibus ergo cave tremulis submergere lintres;
Ne perdas homines fluctibus ergo cave.
Si scelus hoc fugias, semper laudabere cunctis;
Semper amandus eris, si scelus hoc fugias.
Sit tibi laus et honor, trinitas inmensa, per aevum;
Quae tam mira facis, sit tibi laus et honor.
Qui legis ista, precor,’Paulo’ dic ’parce, redemptor’,
Spernere neve velis, qui legis ista, precor.
------------------------------------------------------
Angustae vitae fugiunt consortia Musae,
Claustrorum septis nec habitare volunt.
Per rosulenta magis cupiunt sed ludere prata,
Pauperiem fugiunt, deliciasque colunt:
Quapropter nobis aversae terga dederunt,
Et comitem spernunt me vocitare suum.
Inde est quod vobis inculta poemata mitto,
Suscipe sed libens qualiacumque tamen.
|
|