est et commota. Rex autem celebrata festiuitate paschali Ascittino Catheniensi archidiacono,
quem cancellarium fecerat, Apulie amministrationem commisit, et ipse cum ammirato
in Siciliam rediit. Cancellarius autem ex mandato eiusdem regis, congregato magno
exercitu Beneuentum obsedit et eum usque ad menia deuastauit. Ciues autem eiusdem
ciuitatis eidem uiriliter restiterunt et Petrum archiepiscopum, quem pro parte regis suspectum
habebant, interfecerunt. Cumque ciuitas illa aliquanto tempore fuisset obsessa, quidam de
baronibus rebelles effecti, ciuitatem ingressi hostibus adheserunt. Alii uero sine licencia
relicto exercitu ad propria redierunt. Sicque exercitus diuisus est et ciuitas ab obsidione
liberata. Comes autem Robbertus de Lauritello timens ne suggestione ammirati, qui eum
habebat odio, a rege caperetur, dolens et inuitus a rege recessit. Multi etiam de baronibus
Apulie rebelles effecti guerram maximam in Apulia excitauerant. Quo audito barones Sicilie
et ipsi similiter guerram contra regem in Sicilia commouerunt. Rex autem congregato
exercitu contra eos uenit, qui eum expectare timentes, in Buteria se receperunt, et cum aliquanto
tempore eos obsedisset, mediante Maione ammirato, eis condonauit et in suam gratiam
illos recepit. Interea estate proxima Fredericus rex Theotonicorum Romam uenit, et
ab Adriano papa facto illi sacramento, ut moris est in ecclesia beati Petri sollempniter est
|
|