Nullus hominum occurrit inportunis canibus;
Delatrantes nemo terret nec fuste nec manibus;
Similes sunt conticentes picturis inanibus.
Tu, defensor veritatis, ne petas latibulum.
Pedites asta pulsare quale est periculum?
Ut crementur, fac ligari tales in fasciculum.
Non es homo sine sale, trito plenus pipere,
Oleo perunctus sacro, non cruore viperę;
Nil habes cum Hysmahele, filius es liberę.
Spiritus etenim Christi tuis est in naribus;
Quanta tibi facit deus, ne abscondas paribus;
Vice Petri nos confirma dictis salutaribus.
Omnibus rite locatis mei curam adhibe,
Me presenta regi nostro litterarum adipe,
Dic, quid passus fui Romę pugnando cum haspide.
His adiunge, quod pro rege incensanter dimico,
Hostem ferio lapillis de vase Davitico;
Me bellante iacet hostis compar paralitico.
Tuis verbis adhornato Benzonis audaciam,
Qua lacesso, qui non recte tenet Neomaciam;
Donec laxet, quod usurpat, nullum finem faciam.
|
|