et viderat quando ei Domnus Rex Abbatiam
concesserat affirmare coepit. Tacuit ut
potuit Abbas, et expectavit quid Deus faceret
super his, nescius quia illi fraudulenter loquerentur,
ut possent extorquere ab eo timore
quod habere non poterant ex jure. Deus autem
invigilavit pro servo suo, et non post
multos dies revelata fuerunt haec omnia Regi
Rogerio, qui protinus scripsit ad Comitem,
et misit ei epistolam in haec verba:
“ Multum mihi displicet quod tu, quem
protectorem et defensorem regni mei
posui, eleemosynam meam, cameram propriam,
requiem mei capitis perturbare, inquietare
ausus fuisti, et fortassis merces debita
tuae reddetur praesumptioni. Fallaciter egisti
erga Sancti Clementis Abbatem et Fratres, cujus
orationes mihi clypeus et galea sunt adversus
omnem virtutem inimici. Desiste ab
hac nequitia, ne praeparata super te descendat
ultio, pro hac tua praesumptione tibi
destinata et tibi dico per regni fidem, et
meorum filiorum spem, si mihi Deus hoc
de illis tribuat, quod exopto, nisi desistas,
et eos ulterius inquietare praesumas, sicut
te feci, ita te destruam, et nomen tuum a
filiis hominum ab hac praesenti generatione
usque ad extremam. Praesentes autem literas
quas tibi dirigo, volo ut tu portes et
legi facias in Capitulo, ut audiatur a cunctis,
et cognoscatur ab omnibus super Ecclesia
Sancti Clementis et habitatoribus ejus,
quanta sit mea devotio.”
Ut Rex praeceperat ita Comes fecit: literas
regias detulit, et eas coram Abbate et Fratribus
cum legerentur audivit, et exinde neque
Abbati, neque habitatoribus loci, quamdiu
Domnus Oldrius vixit, quicquam molestiae facere
ausus fuit. Postquam Dominus Deus dedit
sibi et gratiam Regis, ut supra diximus,
et pacem ab omnibus adversaris ejus, coepit
Oldrius studere ad decus Ecclesiae, facere libros,
ornamenta emere, domos ampliare, et
quibuscunque modis poterat, et in terris habere
socios, et in coelestibus elaborabat. Conventionem
vero, quam habuit cum Ricardo
Tergisii potenti viro de quibusdam Ecclesiis
Sancti Martini in Gutta, Sancti Joanni in Scaniani,
et Sancti Cesidii, in ejus breve legere atque cognoscere
possumus. Temporibus siquidem
Domni Oldrii Abbatis in Piscariensi Monasterio
quaedam virtutum signa sunt patrata, quae
ab his, qui noverunt, relata et descripta habentur.
1142. 43. 44. et 45.
Multis itaque virtutibus in tempore Domni
Oldrii Abbatis a Beato Clemente ostensis, coepit
idem Abbas studiosior in orationibus, et in
operibus Ecclesiae sibi commissae inesse. Et per
annorum Domini curricula, videlicet millesimo
centesimo quadragesimo secundo, tertio,
quarto, et quinto, Monasterium religiosissime
gubernabat, et quotidie numerum Fratrum
inibi Deo servientium augere curabat.
1146. et sequentes usque ad 1151.
Perfecto itaque palatio pro adventantium
susceptione cum cellario et cervinaria, continuo
campanarium aedificare coepit, fundavitque
ipsum in anno Dominicae Incarnationis
millesimo centesimo quadragesimo sexto, et
per annorum Domini sequentium curricula,
et erexit illud in altitudinem passuum undecim.
|
|