Pag 514

Mollifica duram, compactam solve, fluentem
Spissa, liquefac spissam, lenique fluentem.
CAP. III. Medicinae fines - Si Medicus cunctos aegros posset medicari
Divinus magis deberet iure vocari.
Vitam prolongat, sed non Medicina perennat.
Non phisicus curat vitam, quamvis bene longat;
Natura, qua conservans, descendens corpora sanat
CAP. IV. Medici incommoda - Stercus et urina sunt Medico fercula prima;
Hydrops quartana sunt Medico scandala plana
CAP. V. Ad praecavendam aegrorum ingratitudinem - Non didici gratis, nec musa sagax Hippocratis
Aegris in stratis serviet absque datis.
Empta solet care multum medicina juvare;
Si quae detur gratis, nil affert utilitatis.
Res dare pro rebus, pro verbis verba solemus:
Pro vanis verbis montanis utimur herbis;
Pro caris rebus, pigmentis et speciebus.
Est medicinalis Medicis data regula talis:
Ut dicatur: da, da, dum profert languidus ha, ha!
Da Medicis primo medium, medio nihil imo.
Dum dolet infirmus Medicus sit pignore firmus;
Instanter quaerat nummos, vel pignus habere;
Fidus nam antiquum conservat pignus amicum,
Nam si post quaeris, quaerens inimicus haberis.
CAP. VI. Medicaster - Fingit se Medicus quivis idiota, prophanus,
Iudaeus, monachus, histrio, rasor, anus,
Sicuti Alchemista Medicus fit aut Saponista,
Aut balneator, falsarius aut oculista.
Hic dum lucra quaerit, virtus in arte perit.