16. LANFR. Bonam conscientiam . Conscientiam
vocat cogitationes, in quibus summopere observanda
est humilitas, qua spreta, in magnos quidam devenerunt
errores, sicut in Epistola ad Romanos
legitur
17. AMBROS. Quos tradidit . Ecclesiae alienationem
Satanae traditionem vocat, ostendens per hoc quantum
malum sit de Ecclesia excludi.
CAP. II.—1. AUGUST. (epist. 59, ad Paulin . qu. 5,
solut). Obsecrationes . Obsecrationes accipiamus
dictas, quas facimus in celebratione sacramentorum,
antequam illud quod est in Domini mensa incipiat
benedici; orationes, cum benedicitur et sanctificatur,
et ad distribuendum comminuitur, quam totam benedictionem
fere omnis Ecclesia Dominica oratione
concludit; interpellationes autem, sive, ut vestri
codices habent, postulationes fiunt, cum populus benedicitur;
quibus peractis et participato tanto sacramento,
gratiarum actio cuncta concludit, quam
etiam in his verbis ultimam commendavit Apostolus.
Haec autem praecipua causa fuit ut, his breviter
praescriptis atque significatis, non putaretur esse
negligendum quod sequitur.
2. LANFR. Ut quietam . In pace principum quies et
regimen servatur Ecclesiarum; nam in bellis et
discordiis eorum tranquillitas dissipatur, tepescit
pietas, distinctio solvitur, distinctione soluta morum
castitas violatur.
3. AMBROS. Hoc enim bonum est . Et hoc probat
adjiciens: qui omnes homines vult salvos fieri, et ad
agnitionem veritatis venire . Quod ostendit dum adjecit,
Unus est enim Deus, hoc est, quia omnium est
Dominus; sed et ille Mediator, qui nos homines nititur
Deo copulare, unus est et hic homo, et per
omnia necessarium ostendit quod conveniat de omnibus
sollicitudinem impendere, eo quod Deus curam
omnibus adhibet, et omnium Dominus est, et
|
|