Ipse autem nullum aliud ornamentum querunt, nisi
quod eis diuina prouidencia concessit. Et quis enim auderet
diuinum opus immutare? Si quis autem naturam mutare uoluerit,
criminalem ipsum putamus. Balnea non facimus, ut corpora
nostra lauemus. Solis ardore calemus et aeris rore infundimur.
Nullam cogitacionem habemus, nec hominibus similibus dominamur,
quia crudele dicimus peruenire hominem ad seruitutem,
que diuina disposicio sicut et nos liberos procreauit. Lapidem in
calcem non resoluimus, ut nobis domos aut palacia fabricemus.
Vascula de terra non facimus. In fossis sine aliqua sollicitudine repausamus.
Nos eciam tales domos habemus. Ad negociandum maria
non nauigamus. Artem bene loquendi non discimus, sed
simplicitate, qua fruimur, nos mentiri non sinit, que enarramus.
Phylosophorum scolas non frequentamus, quorum doctrina discors
est nichilque certum aut stabile, sed semper mendacia diffinit.
Nullos ludos amamus. Cum uero ludi causam exercere uolumus,
nostra et predecessorum nostrorum facta perlegimus. Et cum
debemus inde ridere plangimus et turbamur. Alia uidemus,
quibus corda nostra letantur, uidelicet celum et stellas innumerabiles
corruscare, solem rubicundum, cuius claritate totus mundus
splendorem recipit et calorem. Mare semper purpureum
uidemus; quando tempestatibus mouetur, non dissipat uicinam
terram, sicut in uestris partibus accedit, sed illam ut rorem
amplectitur et congregat. Et ibi uaria genera piscium contemplamur.
Et delectamur eciam uidere florigeros campos, ex quibus
nares nostras odor suauissimus intrat. Delectamur eciam in
optimis locis siluarum et moncium, ubi iocundissimas audimus
cantilenas. Istas siquidem consuetudines obtinemus, quas si
tenere uolueris, tibi uidebitur asperum et amarum. Si autem
imitari nolueris, nobis non ualebis imponere culpam, quia
secundum tenorem epistule actus nostros et doctrinam nostram
tibi paululum declarauimus, que uita nostra nobis esse uidetur.
Vos Affricam et Europam paruo tempore concludere dicitis.
Vos lumen solis deficere facitis, dum cursus sui terminos annorum
postulatis. Vos Patuli fluuii splendido auro currentes absque
calore pauperes redistis. Vos nullum fluuium bibendo
minuistis. Vos monstrastis, ut horribile occeanum nauigaret
homo. Vos omnia manducantes semper ieiunas facies ostenditis
et demonstratis. Vos in sacrificio uestro filios occiditis. Vos
inter humiles discordiam seruatis. Vos suadetis hominibus, ut
nequaquam sufficiant ei spacia terrarum, sed celorum querere
habitaculum preparatis. Per deos uestros multa mala committitis
et perpetratis, ut illi fecerunt. Nam testimonium potestis
accipere a Ioue, deo uestro, et Prosperpina, dea uestra, quos
colitis. Iupiter eciam multas feminas adulterauit. Proserpina
uero multos fecit sui adulterii esse participes. Miseri ergo
adulteros deos colitis et homines non permittitis uiuere sua
|
1
5
10
15
20
25
30
35
40
45
|