X
In purificatione sancte Marie
1. Refulsit almae dies lucis candidus
partum puellae uirginis post aureum,
quando supernis filius de sedibus
a patre missus homo nasci uoluit,
permansit idem proles alti numinis.
2. Legis sacratae sanctis caerimoniis
subiectus omni calamo Mosayco
dignatur esse, qui regit perfulgidos
in arce patris ordines angelicos,
caelumque, terram fundauit ac maria.
3. Postquam puellae dies quadragesimus
est adimpletus iuxta legem domini,
Maria uirgo Iesum sanctum puerum
ulnis sacratis templi tunc in atriis
tulit, tremendi genitoris unicum.
|
|