victoriam triumphalem, de qua ineffabiliter exultamus,
vestra gaudia nostra merito reputantes.
XL.
Citatio iudicis delegati.
... non suis meritis prior Sancti Iohannis de
Monte, viro provido et discreto, I. presbytero talis loci in vero
salutari salutem. Tua bonitas harum significatione cognoscat,
summum pontificem nobis huiusmodi litteras destinasse: «Gregorius
episcopus et cet». Unde tibi mandamus auctoritate qua
fungimur in hac parte, ut pro ratione facienda predicto ad
nostri presentiam venias die tali, nisi conveneris interim
cum eodem.
XLI.
Commissio cause facta a iudice delegato.
Dilecto in Christo fratri C. canonico Imolensi, B. licet
immeritus prior Sancti Iohannis de Monte civitatis Bononie
salutem in Domino. Cum summus pontifex causam que vertitur
inter tales nobis examinandam commiserit et fine canonico
terminandam, ut in litteris eius videbitis contineri bulla
plumbea communitis, propter diversa negotia, huiusmodi non
possum intendere questioni. Qua de re vestre discretioni vices
nostras de communi partium voluntate duximus committendas,
vobis auctoritate qua fungimur iniungentes, ut in causa
predicta mediante iustitia procedatis, eamdem fine debito prout
convenit terminantes.
|
|