Quod dominus Naçarius cum uxore sua multa bona fecit fratribus Minoribus
de Luca seditionis tempore.
De abbatissa Gatharole Ordinis sancte Clare, que totam civitatem Lucensem
provocavit contra fratres Minores, ponendo maculam in electis.
Anno siquidem Dominice incarnationis MCCXXIX, quem
etiam supra posuimus, dominus Nazárus Ghirardini de Luca potestas
Reginus fuit, qui fecit fieri pontem et portam de porta Bernone.
Et tunc primo civitas Regii cepit murari. Et fecit murari
centum brachia a dicta porta inferius versus portam Sancti Stephani.
Et sic successive alii potestates annuatim faciebant murari
ducenta brachia, quousque civitas murata est tota. Verumtamen
propter guerrarum abundantiam aliquando civitas habuit
intervallum murandi. Iste dominus Nazárus habet ymaginem
lapideam super portam Bernonis, quam fecit fieri, et sedet
ibi super equum lapideum in civitate Regii. Pulcher miles fuit
et dives valde, notus meus et amicus, quando habitabam in civitate
Lucana in Ordine fratrum Minorum. Domina Flosolive,
uxor sua, fuit pulchra domina, pinguis et carnosa et michi familiaris
et devota. De Tridento fuit, uxor cuiusdam notarii, ex quo
habuit duas filias, pulcherrimas dominas. Dominus vero Nazárus
abstulit eam viro suo, quando Tridenti fuit potestas, et duxit
eam consentientem ad civitatem Lucanam; suam vero uxorem,
que adhuc vivebat, misit ad quoddam suum castrum, et stetit ibi
quousque obiit. Mortuus est sine filiis dominus Nazárus. Multas
divitias isti domine dedit, que processu temporis in civitate Regina
maritata fuit pariter et decepta, ut michi dixit. Et habuit
eam in uxorem Henricus filius Antonii de Musso; et adhuc vivit
in anno Domini MCCLXXXIII, quo scribimus ista, in festo
sancti Laurentii, die Martis.
Ambo isti, scilicet dominus Nazárus et domina Flosolive,
a multa bona fecerunt fratribus Minoribus de Luca, quando abbatissa
Gatharole Ordinis sancte Clare totam civitatem Lucanam
provocavit et concitavit contra fratres, ponens maculam in electis,
eó quod frater Iacobus de Yseo volebat ipsam absolvere, quia
non bene in illo officio se habebat. Erat enim filia cuiusdam fornarie
|
|