uel propter utrumque sexum uel certe iuxta meritorum diuersitatem,
quatenus alii carnis ob infirmitatis molliciem sexumque teneriorem,
alii uero ossis propter fortitudinis roborem non inconuenienter
nomine ualeant nuncupari. De quibus utique ecclesiae uoce
per psalmistam dicitur: Inperfectum meum uiderunt oculi tui, et in
libro tuo omnes scribentur. Et rursum: Benedixit omnibus timentibus
se dominus, pusillis cum maioribus. Denique isdem mirabilis doctor
in primo Moralium uolumine, quia Christus Iesus non per adoptionem
conlati praerogatiui sed in ueritate dei sit filius, inter cetera
fassus est ita: 'Omnes', inquit, 'qui in fide deo nascuntur, superat,
quia non ut ceteros adoptio sed natura illum diuinitatis exaltat'.
En uir sanctus fide recta deoque plenusque. Hominem namque
Christum de uirgine deum hominemque natum, non ut ceteros
purosque homines ob indultae adoptionis donatiuum sed per
naturam illum diuinitatis in dei filium praemonet exaltatum. Tu
quidem moliris diuidere in duas unum Christum personas, ut, qui
natus est ex uirgine, sit adoptiuus, et qui ex deo, proprius credatur
filius dei, cum et ex deo patre et ex homine matre unus sit Christus,
non per adoptionem sed proprius dei filius. Videtur tibi, ut tuae
testantur litterae, uirum istum praecipuum de sola ea quae ex patre
est generatione hoc in loco disputasse. Interrogo ergo de quibus
ceteris intimatur, 'non ut ceteros illum adoptio', si non de uero
homine Christo disseruit? Cur ad homines quasi de homine conparationis
formolam cui inspiciatur materiali instruxit speculo dicens:
'non illum ut ceteros adoptio'? Non potest istiusmodi conparatio,
nisi sit eiusdem generis 'ceteri', cuius est ille cui conparatur, usitatius
inuehere. Inconueniens quippe nulliusque capax rationis ordo
se palliat, si cum de homine actio uentilatur, alterius generis ista
similitudo, hoc est 'cetera', introducatur. Verbi gratia si dicatur
primus homo non est genitus uel natus sed factus ex limo est terrae,
ceteri autem homines ex utroque sexu et geneti sunt et nati. Non
|
|