In qua lucerna praesulum, uia, forma, speculum,
Donatus martyr inclutam obtinet basilicam;
Seruat et Ianuarium, caeli sidus aureum.
3. Quem non humana studia, non linguae facundia
Digne ualet extollere pro merito gloriae;
Nam quae perferre potuit, quis referre poterit?
4. Caminus per continuum uaporatur triduum,
Vt, quo crematur longius, cremet post uelocius;
Hunc martyr dum ingreditur, nec capillus laeditur.
5. Solante mox angelico gaudet contubernio;
Dum globi strident ignei, crescit ardor fidei;
Sic flamma desiderii perit uis incendii.
6. Victor ab igne trahitur, ad tribunal rapitur;
Consulitur, impetitur: eadem uox redditur,
Nam fixa super stabilem domus uiget lapidem.
7. Dum caro poenis cingitur, mens in astra figitur;
Tormenta reddunt leuia uisa illic praemia;
Sic poenas mille mortium dulce credit otium.
8. Saeuae manus carnificum neruos uellunt uiscerum,
Compages laxa soluitur, postquam nexus tollitur;
Fit per diuersos exitus multiplex interitus.
9. Hinc traditur ferocibus beluarum morsibus,
Ferae sed indomabilem deponentes rabiem
Dimissa colla caelitus sacris flectunt precibus.
|
|