ferro fultis et cordialiter probitate succinctis in vestrum auxilium
hilariter destinamus, spem retinentes in animo quod, dum
ipsorum erit vestre coniuncta potencia, foris ad campos expugnare
poteritis, qui vos fecerunt hucusque incurrere.
Capitulum V
DE NARRACIONIBUS INTER MILITES,
MAGNOS CIVES TERRARUM ET DOMICELLOS
1. De milite ad militem, congaudens ei
Prebent nove prosperitatis eventus nove leticie gaudia demonstrare
et, ubi corporalis effigies se nequit exhibere presentem, consueverunt
dictaminis sciencie per affectionem insignia declarari. Unde, quanta
perfundar gaudiorum plenitudine audiens vos ad Padue civitatis regimen
sublimatum honore, nec ex narracione valeo litteris, nec eciam
oretenus explicare sermonem. Eapropter, nobilitatem vestram precordialiter
exoro, quatenus, si qua huic expedicioni valencia possum
quomodo libet inpertiri, precipere festinetis sic prompte, quemadmodum
de propriis servis faceretis.
2. Responsiva recontestificativa
Ordo temporis id deposcit, ut amicorum successuum et honorum
eventu amici pariter iocundentur. Verum, cum ab antiquo nos unierit
fedus tam amoris quam operis, non michi litteris subinferte sermones,
ubi inter amicos veraces fuerit verus affectus tocius spei et fidei munimine
roboratus. Nichilominus tamen valde iocundum fuit et gratum
quod expressit litteratorie gramma vestrum, sicque vestre visitacioni
et oblacioni dignas referens gracias, tanto ipsam approbavi
digniorem et caram, quanto facientis amicicia michi pre ceteris subiungat
graciosam.
3. De iudice ad electum in potestatem, ut recipiat eum in numero
suorum iudicum
Audito nuper quod electus estis Padue civitatis in presidem, in
cuius presidatus officio vos decet habere certam iudicum quantitatem,
dominabili probitati vestre attentissime supplico quatenus me unum
vestrorum iudicum eligere velitis in numero, qui, in quantum potencia
se in voto concesserit, circa vestros honores et commoda promptus ero.
|
|