Stephanus de Sancto Georgio: Epistolae

Pag 32


Venerabili in Christo patri … etc. Hugo Cardinalis, per Stephanum.
Etsi familiaris amicitie vinculum nondum in unum coniunxerit mentes
nostras, quod firmam alteri de altero spem reserandi vota mentalia stabiliret,
ex illius tamen communis amicitie lege, quam christiana caritas commensurat,
novellam de benivolentia vestra, velut e novo puteo aquam
novam, fiduciam haurientes, pulsamus vos precibus, quasi contractus amicitie
longeve precesserit confidenter, qui profecto pulsari nequaquam versa
vice renuimus, sed passive pulsationis ictus a vobis cum aperiendi prompto
proposito prestolamur. Eapropter paternitatem vestram ex intimo cordis
affectu requirimus et rogamus, quatenus dilectum cappellanum nostrum
… exhibitorem presentium, virum utique bone vite et conversationis
honeste, qui sub nostre ruditatis magisterio dudum incepit sufficienter in
artibus et decenter, habentes, si placet, nostri amoris intuitu, favoris gratia
commendatum et propriam nostram curialiter honorantes in sua, eidem
velitis, quinimmo nobis in ipso, contemplatione nostri, de aliqua prebenda
in ecclesia vestra, quam cito ad id se facultas obtulerit, liberaliter providere.
Nos enim per hoc vobis et ecclesie vestre ad omnia, que honoris ipsius
et vestri proventum sapiant, teneri volumus tenaciter obligati.

Torna all'inizio