Domino episcopo Sabinensi apostolice sedis legato, Stephanus de Sancto
Georgio.
Quasi celeste munus a superis mihi missum, reverende paternitatis
vestre litteras prona devotione recepi, per quas, licet immeritum et indignum
cappellanorum vestrorum consortiis aggregatum, familiaritatis me
vestre titulo decorastis. Reddat vobis Dominus, in retributione iustorum,
honoris prefati profusum ultro mihi a vestre largitatis ubertate collati,
diesque vestros in continue sospitatis augmento stabiliat et in longeve vite
spatium sua clementi propitiatione protrahat stabilitos. Ego siquidem de
honoris huiusmodi collatione gratuita, gratiarum actiones et laudum, non
quas debeo, sed quas possum, cum capitis inclinatione devota et subiectiva
poplitum flexione, dominationi vestre defectivus exolvo. In signum
vero concepte devotionis et debite servitutis, quibus me fateor vobis deinceps
obnixum, unam bursam sericam cum duabus zonis sericis de opere
anglicano benignitati vestre transmitto, rogans et supplicans ut, postquam
vobis placuit recipere me in vestrum, mihi semper precipiatis ut vestro.
Nam et volo et, per gratiam Dei, possum, si experiri vobis id placeat,
vestris incessanter, plus realiter quam vocaliter, iussionibus obedire. Ceterum
germanum meum P. de Sancto Georgio, vestararium Casinensem,
bonitati vestre, a qua promotionis sue, cum auctoritati vestre placuerit,
dependet eventus, humiliter recomendo.
... abbati Stephanus.
|
|