sociis suis, quasi de tabernaculo patris sui, de ordine illo perantiquo,
et venit Cistercium, ibique finxit anchoram stabilitatis sue.
In quo, ut extrema eius preveniam, nec illud vacare posse arbitror,
quod sicut Jacob rediit post annos aliquos ad patrem suum, ita et
ipse ad domum de qua exierat reversus est, cum futurum esse
sciamus reversuram esse fidem ad patres nostros filios Israel, quod
et in monastico ordine oportere consumari existimo. Utique et ad
Grecos redire oportet gratiam, et hoc in proximo, a quibus venit
ad nos, et similiter ad Ytaliam, de qua derivata est ad Gallos, ut
sint primi ultimi et ultimi primi, «ut non glorietur omnis caro in
conspectu domini», qui hunc humiliat et hunc exaltat, reddens unicuique
iuxta opera sua, et eos quos deserit ad horam rursum consolatur
et recipit. Quantum ergo mihi videtur, tempus appropinquat.
9 Et quoniam «iuniori» quandoque, iuxta latoris sententiam,
«revelat dominus quod melius est», non erubuit sequi proficientes
quos lacte nutrierat, sed quasi bona mater letata est videns suam
prolem virtutum incrementis proficere.
|
|