5. Sic a beato Petro missus adiit
Aquileiensem dudum famosissimam
urbem, sacrati uerbi pullulantia
disseminauit sata, quo centuplices
fructus ad alta uexit felix horrea.
6. Christi dicauit mox ibi ecclesiam,
nam fundamentum fidei fortissimum
fixerat unum petram super limpidam,
quam flumen undans nec uentorum fulmina
quassare possunt, torrentes nec pluuiae.
7. Deinde rursus cum corona remeans,
athleta Christi compta pulchris liliis,
mixtisque palmis, lauro atque rosulis
portabat gaudens dyadema uertice,
ingressus urbem Romam Christo comite.
8. His ita gestis pergit Alexandriam
sancto repletus spiritu, latissimos
fines per omnes iugiter Memphiticos
patris tremendi praedicabat unicum
uenisse mundi pro salute filium.
9. Turba crudelis Christi circa militem
tumens parabat tormentorum spicula,
uincxit catenis, transfixit aculeis
dilaniando flagris sancta uiscera,
carceris umbras misit ad phantasticas.
10. Primus superni nominis notitiam
dedit in urbem Marcus Alexandriam,
Christi dicauit mox ibi basilicam,
quam expiauit pretioso sanguine,
uallauit alme fidei munimine.
11. Gloria patri, decus et imperium
sit, nate, semper tibi super sydera,
honor, potestas sanctoque spiritui,
sit trinitatis uirtus indiuiduae
per infinita seculorum secula.
|
|