XLVI.
Quomodo scribit in dignitate positis.
«Fredericus Dei gratia Romanorum imperator et semper
augustus, A. dilecto suo amico abbati Sancti Proculi» vel
«tali clerico» vel «magistro» vel «scolari, viro discreto
et amico dilecto Bononie commoranti, salutem et bonam voluntatem».
Et sic omnes reges scribunt clericis et talibus
personis, et alii principes et magnates cum scribunt minoribus,
ut «talis dux» vel «princeps A. tali clerico, salutem et dilectionem».
Si autem magnis prelatis scriberent, deberent eorum nomina
premittere, ut: «Venerabili in Christo patri domino I.
Dei gratia dignissimo patriarche Aquileiensi» vel «primati
Gradensi, archiepiscopo Ravennati» vel «Mediolanensi, talis dux
salutem et reverentiam et amorem».
XLVII.
Quomodo scribit episcopus archiepiscopo vel de episcopis
suffraganeis.
«Venerabili in Christo domino A. Dei gratia dignissimo
archiepiscopo Ravennati, G. parmensis episcopus salutem et
reverentiam in omnibus tam debitam quam devotam» vel
«salutem et sinceram in Domino caritatem». Archiepiscopus
vero, suffraganeis suis scribendo, nomen suum et preponere
et postponere potest, si placet. Exemplum: «A. Dei gratia archiepiscopus
Ravennas, venerabili in Christo fratri B. regino
episcopo salutem in Domino» vel «dilecto in Domino» aut
«venerabili in Christo fratri, tali episcopo, talis archiepiscopus
in vero salutari salutem».
|
|