de aliquo ditissimo est dicendum: 'Huic a patre patrimonium
non modicum est relictum'.
52. (1)DECRIPTIO.
(2) Descriptio est que rerum consequentium continet perspicuam
et dilucidam cum gravitate expositionem. (3) Et pertinet
quandoque ad indignationem, quandoque ad misericordiam, (4)
ut si dicas: 'Nisi obstiteritis huic tiranno, quasi leo dominabitur
omnibus violenter, acuens dentes in cuiusque fortunas, incursum
faciens in omnes amicos et pariter inimicos notos atque
ignotos, impugnans aliorum domum familiamque perfringens
et omnia labefactans'. (5) Ad misericordiam sic induces: 'Parcendum
est innocentie puerili, quoniam Yoseph, frater noster,
agninam videtur simplicitatem habere: nescit fallere, nescit
etiam cogitare malum. Si eum occidimus proprium genitorem
trahemus ad mortem et nos ipsos reos in perpetuum statuemus.
At si parcimus, non videbimur indiscreti sed amorem fraternum
et innocentiam veram laudabimur conservasse'.
53.(1)DIVISIO.
(2) Divisio est que rem a re semovens utramque absolvit
<ratione> subiecta, (3) hoc modo: 'Cur est egris medicina utendum?