1
Alberto doctori esimio divina sapientia referto morum honestate perspicuo G. scolarium infimus discipularem subiectionem. Tue sapientie ac probitatis fama, reverende doctor, longe lateque diffusa a multis veridici mihi relata me vehementer monuit ac tibi scribere persuasit et de fonte tue doctrine mellifluos haustus petere. Te namque nobili prosapia ortum, sapientia illuminatum, bonis consuetudinis adornatum ut audivi inde recognovi. Magistralem igitur benivolentiam ad nostram accedere urbem humiliter deprecor ac proxima hyeme cum L scolaribus vel eo amplius docere, qui dato pignore reddent te securum per annuale spacium tecum permanere et tui laboris ac doctrine debita reddere.
2
Albertus superno munere siquid est G. Cremonensi scolastico carissimo socio et ceteris sociis semper meliora proficere. Vestrae dilectionis litteras, carissimi socii, ovanter accepimus ac benigna mente perlegimus. Quarum peticionem cum magno desiderio adimpleremus si qua ratione convenienter possemus. Pignoribus namque acceptis ac fide data nos per annum Bononie morari ac studium indesinenter regere proposuimus. Eapropter quod postulatis
|
|