12. Mortui iacent sacerdotes domini,
nec erat membra qui sepulcro conderet.
Post tergum uincti captiuantur alii
iam seruituri.
13. Nequissimorum sacra uasa manibus,
uel quicquid turba optulit fidelium,
sorte diuisa exportantur longius
non reditura.
14. O quae in altum extollebas uerticem
quomodo iaces despecta, inutilis,
pressa ruinis, numquam reparabilis
tempus in omne!
15. Pro cantu tibi, cythara et organo
luctus aduenit, lamentum et gemitus,
ablate tibi sunt uoces ludentium
ad mansionem.
16. Que prius eras ciuitas nobilium,
nunc, heu, facta [es] rusticorum speleum.
Vrbs eras regum: pauperum tugurium
permanes modo.
17. Repleta quondam domibus sublimibus
ornatis mire niueis marmoribus
nunc ferax frugum metiris funiculo
ruricularum.
18. Sanctorum aedes solite nobilium
turmis impleri, nunc replentur uepribus,
pro dolor, facte uulpium confugium
siue serpentium.
|
|