De octo periculis que ab Apostolo describuntur, et de periculorum exemplis.
Sed dicit aliquis: «Quomodo me possum a periculis custodire,
cum totus mundus sit periculis plenus? Nam Apostolus, in secunda
ad Cor. XI, enumerat VIII pericula, dicens: Periculis fluminum,
periculis latronum, periculis ex genere, periculis ex gentibus, periculis
in civitate, periculis in solitudine, periculis in mari, periculis
in falsis fratribus». De periculis fluminum habes exemplum
sancte Clare, que in Ispania submersos in flumine liberavit; Ps.:
In flumine pertransibunt pede. De periculis latronum habes
exemplum sancti Martini, quem quidam latro voluit cum securi
occidere, quem postea convertit ad fidem. Item exemplum beati
Francisci, quem latrones demerserunt in nives, dum per silvam
deambulando Gallice laudes Domino decantaret, sicut etiam in
illo responsorio continetur: Dum seminudo corpore et cet. De
periculis ex genere habetur in Iere. 38, ubi rex Sedechias dixit:
Sollicitus sum propter Iudeos qui transfugerunt ad Caldeos, ne forte
tradar in manus eorum et illudant michi. Item propinqui Darii
dicuntur fuisse illi principes qui coniurationem fecerunt contra
eum et vulneraverunt eum, tempore quo Alexander Magnus
mundum capiebat pugnando. De periculis ex gentibus habetur
I Macha. III. Ubi sic dicitur: «Congregate sunt gentes in multitudine
ut dimicent contra nos, et ignoramus quid agere debeamus.
Domine Deus, ad te sunt oculi nostri, ne pereamus». Simile habetur
II Paralipo. XX, quando congregati sunt Ethiopes et filii
Edom et Moab et Amon, ut contra Iudeos pugnarent. Tunc rex
Iosaphath totum se contulit ad rogandum Deum et dixit: Cum
ignoremus quid agere debeamus, hoc solum habemus residui, ut oculos
nostros dirigamus ad te. De periculis in civitate dixit Dominus
ad Iudeos, Iere. XXV: Ecce in civitate in qua invocatum est nomen
meum incipio flagellare, et vos quasi innocentes inmunes eritis?
Item Iob XXIIII: De civitatibus fecerunt viros gemere, et anima
vulneratorum clamabit, et Deus inultum abire non patitur. De
periculis in solitudine dicitur, Numeri ***, quod in solitudine
Iudei X vicibus Deum temptaverunt, sicut ipse de eis conquestus
est; ideo dixit eis quod in solitudine illa cadavera eorum prostrata
|
|