13. (1) QUOMODO PARES.
(2) Si archiepiscopus archiepiscopo vel episcopo vel episcopus episcopo scripserit eum 'venerabilem fratrem' vocat, (3) hoc modo: 'Venerabili fratri P. Dei gratia archiepiscopo Mediolanensi I. eadem gratia sancte Ravennatis ecclesie archiepiscopus licet indignus salutem et sinceram in Domino caritatem'. (4) Nullus alius archiepiscopus vocat in salutationibus ecclesiam suam 'sanctam' nisi Ravennas. (5) At si scribat episcopo suffraganeo tunc debet preponere nomen suum, hoc modo: 'I. sancte Ravennatis ecclesie archiepiscopus licet immeritus venerabili fratri H. Bononiensi episcopo salutem et orationem in Domino' vel 'salutem in Domino' vel 'salutem in acimis sinceritatis et veritatis'.
14. (1) QUOMODO EPISCOPI SALUTENT SUBDITOS SUOS.
(2) Episcopi vero scribunt minoribus in hunc modum: 'H. Dei gratia Bononiensis episcopus licet indignus dilecto in Christo filio magistro T. archidiacono ecclesie Bononiensis salutem in Domino' vel 'salutem et benedictionem' vel 'salutem cum sincere dilectionis affectu'.
(3) Abbati mittit 'salutem et in sancta religione perseverantiam'