Episcopo Pactensi Nicolaus de Rocca.
Multiplici vobis, domine, ratione congaudeo, quod in paradiso deliciarum
et loco pascue fortune vos celebris felicitas collocavit. Gaudeo quippe
vos Ligurum accidentia subito non timere tonitrua. Gaudeo viarum discriminosis
eventibus et hospitiorum non minus dubiis cessisse periculis.
Gaudeo vos illam virtutem, securitatis alumpnam, levius verbo quam facto
portabilem, verum sophisticam, melius ori quam corpori consonam, qua
iam nos omnes ditatos inspicimus, corporalem inopiam non sentire. Gaudeo
sospites adesse vos corpore, ut sistat saltem persone secunde suffragium,
cui passiones absentium familiari quodammodo conquestione
monstrentur. Gaudeo vos abesse loco, non animo, manifesta ratione presumens
quod, exaudibilis utinam in ore vestro, frequentetur oratio, solis
nostri circuitum metientis, iam bina temporum seu fastidita potius revolutione,
Liguriam ad hemisperium fertilis et redolentis Apulie crebris
intercessionibus vocativa. Hec igitur anxius potius recitare quam scribere,
eatenus me vobis offero, domine, quatenus ad nutum recipere me placeat
et habere. Curie siquidem conditiones et statum, qualibet scriptura lucidius,
vobis lator presentium referet viva voce, unum verumtamen scriptura
non preterit, quod si locus sit coniecturis in talibus, iam pedem in streugam
erexerimus, ad lares patrios, nisi fortune protervitas consueta, quod
absit, impedimenta traiiciat, celeriter redituri.
|
|