Hugo cardinalis … episcopo Claromontensi.
Habet humani status flebilis et amara conditio, ut cui census exuberat
desit proles et cui proles exuberat desit census: hinc profecto provenire
dinoscitur, ut habeat ille quod doleat, dum orbus liberis, alieno censum
nutrit heredi; hinc habet unde gemat, dum inops opibus, non habere se
conspicit, quod prolis necessitatibus administret. Habet etiam status eiusdem
miseranda conditio, ut qui divitiis affluit masculine prolis fecunditate
letetur, futurus letior dum suas auxerit ex copulatione nuruum facultates,
et qui carentia facultatis urgetur angustetur feminee turba prolis,
futurus angustior dum facultatis inopis tenuitas exquisita non exhibet
unde generos sibi querat. Sicque fit ut vix relinquatur aliquis exors, ut fere
non habeat unde cum status prioris qualitate rixetur. Hinc est quod cum
quidam civis Aniciensis Johannes de Gozobaude nomine, qui prescripti
status ultimi conditione deprimitur, sit nobis antique dilectionis et amicitie
puritate convinctus, et septenarii numeri prolis feminee onerosa turba
circumdatus, iamque tres de septenario ipso filias maritali consortio copulavit;
|
|