possitis pro concordia facienda, vel oratores mittere, sicut
de vestra fuerit voluntate.
XLVII.
De legato sedis apostolice ad Ferrarienses offensos.
Gregorius domini pape notarius et apostolice sedis legatus,
viris nobilibus et utinam sapientibus Salinguerre et universis in
Ferraria constitutis ad cor unitatis redire et viam agnoscere
veritatis. Aperite oculos vestros et videte vestram terram circumdatam
inimicis, ira Domini permittente que super vos et
civitatem vestram noscitur descendisse, que temere discedens
ab uberibus ecclesie matris sue, se miserabiliter sociavit persecutoribus
fidei christiane. Unde vestram monemus prudentiam,
si qua remansit in vobis, et precipimus, si locum admonitio
non haberet, ut ad Dominum redeatis et ad mandata
ecclesie sacrosancte: alioquin in frontibus fidelium crucis signaculum
imponemus, cuius virtute mirabili vos inimicos Ihesus
Christi confundent, et expugnabunt omnem hereticam
pravitatem.
XLVIII.
De amico petente consilium ab amico.
Audire potuistis, et nunc certa veritate noscatis quod
parentelam cum domino C. fecimus divina gratia mediante,
et, promissione facta et iuramento interposito corporali, uni
ex filiis eius nostram tenemur filiam tradere in uxorem; quod
libenter, prout decet, volumus adimplere: nam mortis anime
non evitat periculum, qui quod promisit et iuravit non ducit
pro viribus ad effectum. Sane cum tempus advenerit pubertatis,
in quo precedentia debent sponsalia per matrimonium
confirmari, et de recipiendo vel recusando unum vel alium
in nostra sit positum optione, vos rogamus, qui habetis notitiam
predictorum, ut nobis velitis consulere quem ipsorum in
generum eligamus.
|
|