in altari ignem, membra que cesa sunt desuper ordinantes » .
Secundo modo accipitur subiectum in statu, et sic subiectum
dividitur contra rectorem vel gubernatorem, sive rector
vocetur rex sive imperator sive preses sive prefectus sive episcopus
sive abbas sive alio nomine, iuxta illud Hester 13[,2]
« Volui clementia et bonitate gubernare subiectos » .
Tertio modo accipitur subiectum in bonitate, et sic subiectum
dividitur contra melius, sive sit bonum pertinens ad animam
sive ad corpus sive ad res exteriores. Unde Eph. 5[,21]
« Subiecti invicem in timore Christi » , in quantum scilicet ex
humilitate quilibet debet reputare alium meliorem quam se,
iuxta illud Philip. 2[,3] « Superiores invicem arbitrantes » . Et
in predictis modis subiectum accipitur adiective.
Quarto modo accipitur subiectum in propositione, et sic
subiectum dividitur contra predicatum, iuxta illud Philosophi
in libro Predicamentorum « Quando alterum de altero predicatur
ut de subicto (sic), quecumque de eo quod predicatur dicuntur,
etiam de subiecto dicuntur » .
Quinto modo accipitur subiectum in transmutatione, et sic
subiectum dividitur contra contrarios terminos, sicut probat
Philosophus in I Phisicorum : quod principia sunt contraria, et
tertium oportet esse subiectum. Et hic etiam subiectum potest
teneri adiective.
Sexto modo accipitur subiectum in consideratione vel entitate
vel comparatione, et tunc est idem quod res; et sic dividitur
contra rationem, iuxta illud Philosophi in V Ethicorum
« Virtus et iustitia est quidem subiecto idem, esse autem non
idem » , idest sunt idem re sed differunt ratione.
Septimo modo accipitur subiectum in inherentia, et sic subiectum
|
|