27. (1) CONIUNCTIO.
(2) Coniunctio est cum primis et sequentibus partibus orationis
verbum interpositum est reddendum, (3) hoc modo: 'Forme
dignitas aut morbo deflorescit aut vetustate' vel sic: 'Gratiam
iusti recipiunt in presenti sed gloriam in futuro'. Item:
'Christus et diabolum condemnabit et mundum'. (4) Et iste color
dicitur ceuma a medio.
28. (1) ADIUNTIO.
(2) Adiunctio est a superiori vel ab inferiori çeuma et vocatur
omopitoton. (3) A superiori fit quando verbum premittitur, ut
si dicam: 'Deflorescit forme dignitas aut morbo aut vetustate'.
(4) Ab inferiori fit quando verbum postponitur, ut si dicas:
'Aut morbo aut vetustate forme dignitas deflorescit'.
(5) Et nota quod çeumate frequentius quam ipoçeusi est
utendum, quia çeuma brevitatem inducit sed ipozeusis reddit
orationem festinam. Unde potest de facili satietatem inducere.
29. (1) CONDUPLICATIO.
(2) Conduplicatio est ratione amplificationis aut commiserationis
eiusdem verbi aut plurimorum verborum iteratio, (3) ut
si dicam: 'Tumultus Gai Gracci tumultus comparat intestinos'.