praefatos, Abbatem et Conventum, de
possessionibus antedictis, juris solennitate servata,
vendere et alienare permittas: ne ipsius
monasterii bona ulterius ab usurarum voragine
incumbente, inutiliter lapidentur.
Cap. LII.
Rescribit quibusdam fidelibus suis, commendans
eos de praeteritis, et animans ad futura.
Fidelitatis vestrae literas benigne accepimus,
et ipsarum tenorem intelleximus diligenter,
fidelem solicitudinem et probatam diligentiam,
quam in nostris servitiis, per easdem
literas vestras accepimus, et per rerum
evidentiam habere vos scimus, non immerito
commendantes. Propter quod grata servitia
quae multipliciter erga Majestatem nostram geritis,
incessanter alta mente concepimus: in
firmo gerentes proposito, ea vobis dignis meritis
compensare. Volumus itaque, ut in defensione
fidelium, et offensione nostrorum rebellium,
more solito, tam fideliter quam viriliter
intendat vestra devotio cum effectu; ita,
quod ipsa semper operum efficacia patens, praesens
et continua devotio, vos in Excellentiae
nostrae oculis commendabiles repraesentet. Et
ecce, quod ad oppressionem et exterminium
nostrorum rebellium, et defensionem nostrorum
fidelium ipsarum partium, H. Illustrem
regem Sardiniae, dilectum filium nostrum, ad
civitatem Ravennae providimus destinandum.