invicem et iureiurando, datis hinc inde patentibus litteris, alternatis sigillis
regiis consignatis, in terra vestra Vasconie regionis convenire et in planitie
Burdegalensi kalendis videlicet iunii proximo futuri, ipsorum regum
quolibet se centesimo milite, particulare certamen inire, simulque confligere
in animorum impetu firmaverunt, hoc in penam partis succumbentis
adiecto, quod victus numquam ex tunc, si de certamine ipso vivus evaserit,
regem se nec alicuius terre dominum nominabit, immo toto tempore
vite sue solus incedet. Et reges ipsi deliberant vos per sollempnes requirere
nuntios, ut vobis illuc accedere placeat et campum taliter custodire,
quod neutri partium possit per aliquos alios iniuria vel violentia irrogari.
Et priusquam ibidem convenerint reges ipsi, si forte tunc non invenerint
vos ibidem, et premisisse vos contigerit aliquem loco vestri; in illius sic
premissi, vel si talem non premisisse contigerit, in manibus locum
vestrum in predicta terra tenentis, iuramentum super servandis predictis
omnibus innovabunt et adventum vestrum ad terram prefatam per XXX
dierum spatium expectabunt. Et si fortasse contigerit vos vel non posse aliquatenus,
vel nolle penitus ad hoc in predicta terra vestram presentiam
exhibere, promiserunt et iuraverunt reges prefati aliam de communi consensu
personam eligere, coram qua campum custodiente, sub forma prescripta
predictum inire certamen et aggredi tenebuntur. Ista est scientia
facti, princeps egregie, sicut de illa nobis ex tenore litterarum, quas dictus
rex Sycilie, suo et dicti regis Aragonum sigillorum munimine roboratas,
que non absque dominorum summi pontificis et cardinalium admiratione
non modica et stupore in crastino purificationis beate Virginis in consistorio
lecte fuerunt, <ut> constitit evidenter, eidem summo pontifici destinavit.
Super hiis autem dolere potest et utique dolet Romana mater ecclesia,
et ad sic inordinata sicque improvide presertim per eundem regem
Sycilie attemptata impedienda, vias omnes et modos quos potest congruos,
sicut eam decet, que mater est omnium et magistra ac sapientibus insipientibus
debitrix constituta cogitare non cessat. Sicque inter vias alias
ordinavit ad presens ad prefatum regem Sycilie, qui iam veniendi versus
Franciam, ad parandum se ad conflictum predictum, iter arripuit, ut, si
fieri poterit, idem rex Sycilie inducatur, ut omnino desistat a predictis sic
temere attentatis, sollempnem nuntium destinare, precipue cum dominus
|
|