Collegium cappellanorum domini Hugonis cardinalis … concappellano
eorum, per Stephanum de Sancto Georgio, camerarium ipius cardinalis.
Triformis conflictus militantis Ecclesie – mundi, carnis et demonis – ad
triumphantis Ecclesie gestiens pervenire consortium, adventus quatruplicis
verbi Dei, ex illa de qua fuerat virgine prophetatum «ecce virgo concipiet
et pariet filium», a tota trinitate communiter incarnati – de sinu videlicet
patris in mundum, de triclinio trinitatis in animum, de solio equitatis ad
particulare anime corporisque divortium et ad universale de maiestatis
throno iudicium – celebrat devote solennia. Inter que illa presertim exclamatoria
vaticinia prophetarum misteriose proclamant, que, mistice facientia
de singulis adventibus mentionem, statuit in augmentum virtutis et
gratie mater ecclesia super canticum illud virgineum iubileis hoc tempore
vocibus concinenda. Que siquidem in cordis et vocis serena sonoritate cantata,
preter spiritualis gratie dona, que tribuunt, propinant utique cum aromaticis
speciebus genimina grece vitis et nectaris, que, fecundis exhausta
calicibus, mentes et corda letificant, ac linguas disertas faciunt potatorum.
Cupientes igitur fructus exclamationum huiusmodi, tam spiritualis, quam
etiam corporalis, ut ipsius sit nobis possessio communicata iocundior, una
nobiscum participio vos gaudere, cras die sabbati nos hylariter ad nostras
vesperas invitamus, ut antiphonam illam: «O oriens splendor lucis eterne»,
excelse vocis organis decantantes, laxatis sodalium cantorum pre
cantu spiritibus in erogatione pigmentaria specierum et liquoris exhibitione
greci simul atque nectarei festiva noctis illius initia peragatis.
|
|