presentium, nuntium nostrum securum et specialem, argentum
vestrum bonum et legale ad marchum Colonie, sicut accepimus,
vobis misimus optime ponderatum, vestre probitati grates
quas possumus referentes, pro tanta gratia quam fecistis; pro
qua sumus amicitie vestre futuris temporibus obligati ad similia
et maiora.
LXVII.
De mercatore ad mercatorem.
Viro commendabili multa discretione, et dilecto propria bonitate,
P. honorato mercatori Florentie, P. mercator Senensis
salutem et prosperitatem. Credo, nec dubito experientia declarante,
quod sicut libenter tracto de vestro commodo et honore,
vos ex parte vestra cupitis suo loco et tempore meis utilitatibus
providere. Inde est quod latorem presentium cum C. libris
imperialium ad vos mitto, quos in pannis de vestro consilio
debeat investire, dilectionem vestram attentius deprecans, ut,
super his velitis quod sit utile respicere diligenter, scientes
quod brachium staminis fortis et petia talis panni in terra
nostra pro tanta pecunia invenitur.
LXVIII.
Responsiva ad predictam.
Circa preces vestras, quas semper cupio exaudire, sollicitus
existens pro viribus et attentus, stationes mercatorum terre
nostre cum vestro nuntio circuivi, affectans aliquid emere vel
mercari quod dilectionis vestre utilitatibus responderet. Sed
cum nihil apparuerit unde lucrum valeat reportari, eumdem
nuntium vestrum ad vos mitto cum pecunia quam misistis.
|
|