In ista civitate Damasci. quasi in medio civitatis. est unum monasterium.
ubi habitant calogeri sive fratres greci cristiani. et ibi fuit
baptizatus beatus Paulus apostolus in vico. qui vocatur rectus. in domo
Jude. et beatus Ananyas ex precepto Domini ibi baptizavit eum. ut habetur
Actuum IXº capitulo. et ibi beatus Paulus visum recepit. dum baptizatus
fuit: sed extra civitatem Damasci ad tria miliaria est locus. ubi audivit
illam beatam vocem de celo dicentem: Saule. Saule. quid me persequeris?
Et vocatur patria Zophar. et ibi cecidit et visum perditit. Hec loca venerabilia
cum devocione libentissime visitavi ob reverenciam illius doctoris
gencium. qui prius fuit Saulus. persecutor. et postea Paulus. versus mucro.
Furor Sauli liber est prudencia Pauli.
In Damasco inveni ambaxatores regis Armenie. qui revertebantur
[in] Armeniam. Voluerunt enim ire ad Soldanum. causa tractandi
pacem cum eo. sed non ascenderunt nisi usque Gazaram et postea rejecti
fuerunt ex parte Soldani. propter nova que insonuerunt de passagio. Ideo
Soldanus turbatus noluit pacem cum rege Armenie. ymmo parat se ad
destruendum Armeniam suo posse. et ego locutus fui cum illis ambaxatoribus
al can sive hospicium. ubi conveniunt Cristiani. juxta castrum
Soldani in Damasco. Can in arabico sive saracenico idem est. quod hospicium:
et ego eram in eodem hospicio cum eis. et multum lamentabantur
de Cristianis qui permittebant Armeniam destruere.
In illa civitate Damasci. die noctuque vadit et revertitur tanta multitudo
camelorum. quod videntibus est mirabile. quia nunc centum.
nunc trecenti. nunc mille similiter onerati victualibus et mercathoriis:
verum est quod non habent alios currus portantes eis necessaria nisi
camelos. et. propter magnam multitudinem gencium. necesse est eis habere
multos camelos.
In illa civitate Damasci. regnabat Benadab. rex Syrie. qui dixit de
populo Israel. Dii moncium sunt dii eorum. et ideo de prevalente in